ကီၢ်ပယီၤမုၣ်ဖိ ၄၂ ဂၤဘၣ်တၢ်ဆါလီၤအီၣ်အီၤလၢ ဃဲသဲအလီၢ် ဖဲ ကၠီၣ်တဲၣ် ကါခၠးနၣ်ဘူၣ်ရံၣ်

ကီၢ်ကၠီၣ် ကးခၠးနၣ်ဘူၣ်ရံၣ် ကီၢ်ရ့ၣ်အပူၤ ကီၢ်ပယီၤမုၣ်ဖိ ၄၂ ဂၤ ဘၣ်တၢ်ဆါလီၤအီၣ်အီၤဆူ ဃဲသဲ အလီၢ်အံၤ ကၠီၣ်တဲၣ်ပၢၤကီၢ်ဒီးပှၤလၢအထီဒါတၢ်ကူၣ်ကူအီၣ်ပှၤကူပှၤကညီကရၢတဖၣ် ပာ်ဖှိၣ်ထီၣ် အသးဒီး လဲၤထုးထီၣ်မၤစၢၤက့ၤ၀ဲန့ၣ် ထဲရၣ် တၢ်ကစီၣ်သန့ပာ်ဖျါထီၣ်ဝဲဒၣ်လီၤ.

ကးခၠးနၣ်ဘူၣ်ရံၣ်ကီၢ်ရ့ၣ် ဘါရူရၣ် ဘၣ်ကလိၣ်အံၤ ဘၣ်တၢ်မၢၤအီၤလၢကမၤ၀ဲဃဲသဲတၢ်မၤ၀ံၤ, ဒ်သိး တၢ်ကမၤစၢၤအီၤအဂီၢ် ပိာ်မုၣ်ဖိတဂၤဃ့၀ဲတၢ်မၤစၢၤလၢ တၢ်ထီဒါပှၤမၤကူဆါတၢ်ပှာ်ဘျးစဲကရၢ, ကၠီၣ်တဲၣ်လူၤန့ၢ်တၢ်ကဲထီၣ်သးကရၢ, ကးခၠးနၣ်ဘူၣ်ရံၣ် ပၢၤကီၢ်တဖၣ် ပာ်ဖှိၣ်ထီၣ်အသး၀ံၤ ဖဲ စဲးပထ့ဘၢၣ် ၉ သီအနံၤ မုၢ်ဟါလီၤန့ၣ် တၢ်လဲၤသမံသမိး၀ဲ ဘၣ်ကလိၣ်န့ၣ်လီၤ. လၢဘၣ်ကလိၣ် မဲထံကလၤအဒၢးပူၤ ပိာ်မုၣ် ၄၂ ဂၤတၢ်ထံၣ်အီၤဝံၤဒီး အ၀ဲသ့ၣ်တဖၣ် တၢ်မၢအီၤလၢ ကကဲ၀ဲ ဃဲသဲ အဂ့ၢ်န့ၣ် တဲ၀ဲဒၣ်လီၤ.

၄၂ ဂၤတဖၣ် ၁၈ နံၣ်ဆူအဖီလာ်ပၣ်ဃုာ်၀ဲ ၁၄ ဂၤလီၤ. လၢဒၢး၀ဲအံၤအပူၤ ၁၅ နံၣ်ဆူအဖီလာ် ပၣ်၀ဲ ၄ ဂၤ ဒီး သးနံၣ် ၁၂ နံၣ် ပိာ်မုၣ်ဖိပၣ်ဃုာ်၀ဲတဂၤဝံၤ အ၀ဲသ့ၣ်ခဲလၢာ်ဟဲ၀ဲလၢ​ ကီၢ်ပယီၤပူၤအဂ့ၢ် စံး၀ဲ ဒၣ်လီၤ.

ဘၣ်ထွဲတၢ်ဂ့ၢ်အံၤ ဘၣ်ကလိၣ်အကစၢ် နဲၣ်အိၣ်ဒိဆၣ်ဖ့ၣ်ယူၣ် ၃၂ နံၣ်, နဲၣ်၀ိဆ့ထီ ၅၂ နံၣ်ဒီး နါဆီဆီၣ်ဆကိတလၣ် ၄၆ နံၣ်တဖၣ် ပှၤလၢတအဲၣ်ဒိးကဲ ဃဲသဲဘၣ်ဒီး မၢဆူၣ်မၤဆူၣ်၀ဲဒ်အံၤအဃိ, ဖိသၣ်လၢအသးနံၣ်တပှဲၤတဖၣ် မၤပျံၤ၀ဲဒီးမၢ၀ဲအဃိ ကဆဲးဟံးဂ့ၢ်၀ီ၀ဲအဂ့ၢ်န့ၣ် ပှၤလၢအလူၤန့ၢ်တၢ် ကဲထီၣ်အသး သုးခိၣ်ဒိၣ်ဖိ ၂ ၀ၣ်ခၠၣ်ရၣ်ဖိထီလိ စံးဘၣ်၀ဲ ကၠီၣ်တဲၣ်တၢ်ကစီၣ်၀ဲၤလီၢ်လီၤ.