ကီၢ်ပယီၤပူၤ ကလုာ်ဒူၣ်ပၣ်တံၣ်တနီၤ ခၢၣ်စးတဖၣ် ကၠီၣ်တၢ်ပၢဆှၢရဲၣ်ကျဲၤတဖၣ် လၢကဃုသ့ၣ်ညါ ၀ဲအဂီၢ် တလါအံၤ စဲးပထ့ဘၢၣ် ၁၆ သီအနံၤဟဲတုၤ၀ဲလၢ ကီၢ်ကၠီၢ်တဲၣ်၀ံၤ ကတီၢ်အံၤမၤ၀ဲ တၢ်ဃု သ့ၣ်ညါ တဖၣ်ဖဲ ၀့ၢ်ဘီကီးအပူၤန့ၣ်လီၤ.
ကညီကမျၢၢ်ပၣ်တံၣ် KPP/ တလၢၤကီၢ်ဒီဘ့ၣ်ဒံၣ်မိၣ်ကရ့ၣ်စံၣ်ပၣ်တံၣ် AMRD/ ခၠီကလုာ်ဒူၣ်ပၣ်တံၣ် CNP, ခၠီတၢ်ဂုၤထီၣ်ပသီထီၣ်ပၣ်တံၣ် CPP, ရခၢၣ်ကလုာ်ဒူၣ်တၢ်ဂုၤထီၣ်ပသီထီၣ်ပၣ်တံၣ် ARNDP , ယိၤဒိၣ်ကလုာ်ဒံၣ်မိၣ်ကရဲၣ်တ့ၣ်ပၣ်တံၣ် SNDP , ဒီး ဒီကလုာ်ဒံၣ်မိၣ်ကရ့ၣ်စံၣ် ဂံၢ်ဘါ NDF ပၣ်တံၣ်, တဖၣ် ခၢၣ်စးအံၤ ဃုသ့ၣ်ညါ၀ဲ ကၠီၣ်တဲၣ်တၢ်ပၢဆှၢရဲၣ်ကျဲၤတုၤလၢတနံၤအံၤလီၤ.
KPP အနဲၣ်ရွဲၢ်သဃဲၤ စီၤမိမၠံး စံး၀ဲ“ ပ၀ဲသ့ၣ် ပဃုသ့ၣ်ညါဘၣ်ဃးဒီး ဒူသ၀ီတၢ်ပၢဆှၢရဲၣ်ကျဲၤပတီၢ်, ကီၢ်ဆၣ်ပတီၢ်, ကီၢ်ရ့ၣ်ပတီၢ်,၀ံၤအလီၢ်ခံ ကၠီၣ်တဲၣ်ပၣ်လံၣ်မၣ် တၢ်ပၢဆှၢရဲၣ်ကျဲၤဒီး အ၀ဲသ့ၣ်အ၀့ၢ် ဘီကီး အတၢ်ဃ့တၢ်လၤတဖၣ်စ့ၢ်ကီး ပဃုသ့ၣ်ညါအီၤအဂ့ၢ်” စံးဘၣ်၀ဲ ခ့ၣ်အဲးစံၣ်လီၤ.
တၢ်ဟဲဃုသ့ၣ်ညါတဘျီအံၤ ကညီ,ယိၤဒိၣ်,ရခၢၣ်,ခၠီ,တလၢၤ ကလုာ်ဒူၣ်ပၣ်တံၣ်တဖၣ် ကမျၢၢ်ဘျီၣ် ဒိၣ်ပတီၢ်ဒီး ဒီကလုာ်ဘျီၣ်ပတီၢ်ခၢၣ်စးတဖၣ် ပာ်ဖှိၣ်ထီၣ်သးခဲလၢာ် ၁၆ ဂၤပၣ်ဃုာ်၀ဲဒၣ်လီၤ.
ကလုာ်ဒူၣ်ခၢၣ်စးတဖၣ်အံၤန့ၣ် ကတီၢ်အံၤလဲၤဃုသ့ၣ်ညါ၀ဲဒၣ်လၢ တၢ်ဃံတၢ်လၤအ၀ဲၤဒၢးဒီး ပၣ်လံၣ်မၣ်အ၀ဲၤဒၢး တၢ်ပၢဆှၢရဲၣ်ကျဲၤတဖၣ်၀ံၤ ဘၣ်ထွဲကျိၣ်စ့ Budget တၢ်တိၤဃ့တဖၣ်စ့ၢ်ကီး ဃုသ့ၣညါ၀ဲဒၣ်န့ၣ်ပသ့ၣ်ညါဘၣ်အီၤလီၤ.
လၢတၢ်လဲၤကျဲတဘျီအံၤ ထံရူၢ်ကီၢ်သဲးပှၤစ့အ့ၣ်ဖိ, လီၢ်ခၢၣ်သးတၢ်မၤလီၤသြတုာ်ဒီး လီၢ်က၀ီၤတၢ် ပၢဆှၢတၢ်ဂ့ၢ်တဖၣ် အသံၣ်အိၣ်ရံၣ်အံၤ လၢကံၢ်မဲ ဖၠၢ်စိမိၤကၠိ ထံရူၢ်ကီၢ်သဲး စဲအ့ၣ်၀ဲၤလီၢ် သရၣ်မုၣ် တဖၣ်တခီ ခၢၣ်စးတဖၣ်အံၤ သိၣ်လိအီၤအဂ့ၢ် စီၤမၠိမၠံး တဲအါထီၣ်ကဒီး၀ဲလီၤ.
“ဖဲအံၤတခီ လီၢ်ခၢၣ်သးတၢ်ဖီၣ်ပျံၤတဖၣ် တၢ်ထုးလီၤအီၤကယီကယီ၀ံၤဒီး တၢ်ဖီလာ်တၢ်ရၢကရိ တဖၣ် တၢ်ဟ့ၣ်စိဟ့ၣ်ကမီၤသနူအံၤ မၤထွဲ၀ဲလီၤ. အ၀ဲသ့ၣ်တခီ တၢ်လၢအလီၤဆီလိာ်အသးဒီး ပှၤန့ၣ် တၢ်ဟးထီၣ်လီၤညီ, တၢ်ဆဲးကျိးတဖၣ်ဂ့ၤ, လီၤကရၢကရိ၀ံၤ ဖံးမၤတၢ်ညီလီၤ. ပှၤတဂၤ အတၢ်ဖံးတၢ်မၤဒီး ကံၢ်စီတခီဒု တလီၤဆီဘၣ်အဂ့ၢ်” စီၤမိမၠံးရှဲပၠး၀ဲဒၣ်လီၤ.
KWAG တၢ်ကရၢကရိ နီၢ်စူၢ်စဲနၢ် လၣ်လၣ်စိ လၢအလဲၤထီၣ်ဘၣ်၀ဲ ကီၢ်ကၠီၣ်တဲၣ် တၢ်ထံၣ်လိာ် တၢၣ် ပီၣ်သကိးအမူးစ့ၢ်ကီး စံး၀ဲ “ လၢကလုာ်ဒူၣ်ခၢၣ်စးတဖၣ် အဂီၢ် တၢ်ဃုသ့ၣ်ညါတၢ်လဲၤကျဲအံၤ ဂ့ၤ၀ဲဒိၣ်မးလီၤ. ဘၣ်မနုၤဃိလဲၣ်န့ၣ် ကီၢ်ပယီၤပူၤအံၤ အခဲအံၤမး မ့ၢ်၀ဲတၢ်ဆီတလဲအိၣ်ထီၣ်သီသီ အဃိ ကဘၣ်ဟံးန့ၢ်၀ဲ ပှၤထံဂၤကီၢ်ဂၤအတၢ်လဲၤခီဖျိဖးအါလီၤ အဂ့ၢ်” တဲပၠး၀ဲဒၣ်အတၢ်ထံၣ်လီၤ.
ကလုာ်ဒူၣ်ပၣ်တံၣ်တဖၣ် အတၢ်လဲၤဃုသ့ၣ်ညါ တၢ်လဲၤကျဲအံၤ ဒ်သိးကကဲထီၣ်လိၣ်ထီၣ်အဂီၢ် ပှၤလၢအမၤစၢၤတၢ် လီၢ်ခၢၣ်သးတၢ်ဂုၤထီၣ်ပသီထီၣ်ပှၤဒိၣ်ပှမထီတဖၣ် ပှၤဘၣ်မူဘၣ်ဒါတဖၣ် ကိၣ်အီၣ်သူၣ်ည့ စံး၀ဲ “ ပ၀ဲသ့ၣ်ပထံပကီၢ် ဒံၣ်မိၣ်ကရ့ၣ်စံၣ် တၢ်ဆီလဲအိၣ်ထီၣ်၀ဲလီၤ. လၢတၢ်အံၤအ ဃိ ပှၤအဂၤတဖၣ် အတၢ်လဲၤခီဖျိစ့ၢ်ကီး ပြကၢးဃုသ့ၣ်ညါလီၤ. လၢပ၀ဲသ့ၣ်တကပၤစ့ၢ်ကီး ဒ်ပသ့အသိးဒီး မၤစၢၤအီၤဒ်န့ၣ်လီၤ အဂ့ၢ်” စံးဘၣ်၀ဲ ခ့ၣ်အဲးစံၣ်လီၤ.
ကလုာ်ဒူၣ်ခၢၣ်စးတဖၣ်အံၤ လါလၢကဟဲ အီးကထိဘၢၣ် ၄ သီအနံၤ ကဟးထီၣ်၀ဲဒၣ်ဆူ ကၠီၣ်တဲၣ်ဒီး က့ၤ၀ဲဆူ ကီၢ်ပယီၤပူၤအဂ့ၢ် ပသ့ၣ်ညါဘၣ်အီၤတလီၤ.
Post a Comment