ခီဖျိကီၢ်ပယီၤပဒိၣ်ကရူၢ်တဖၣ် ဘၣ်ထွဲတၢ်မုာ်တၢ်ခုၣ်တၢ်ဂိာ်စုဂိာ်ခီၣ်အဃိ ကညီဒီကလုာ်စၢ ဖှိၣ်ကရၢ ခ့ၣ်အဲၣ်ယူၣ်ဒီး သုးဂ့ၢ် ၀ီလၢအမ့ၢ် ခ့ၣ်အဲန်အဲလ်အ့ၣ် အဘၢၣ်စၢၤ တၢ်ပာ်သးတဒ်သိး အဃိ လၢကရၢအပူၤသဲၣ်ဖးကွံာ်၀ဲဒၣ်ခံခီအဂ့ၢ် ပှၤလၢ အဃုသ့ၣ်ညါတၢ်တဖၣ်စံး၀ဲလီၤ.
မုၢ်ဘူၣ်အနံၤ လီၢ်ခၢၣ်သးပတီၢ်တၢ်ရ့လိာ်မုာ်လိာ်၀ဲၤဒၢး ၀့ၢ်ဖၣ်အၣ်အပူၤ တၢ်ကအိးထီၣ်အီၤ အဂီၢ် ခ့ၣ်အဲန်အဲလ်အ့ၣ် သုးဂ့ၢ် ၀ီခိၣ်ကျၢၢ် သုးခိၣ်ကျၢၢ် မူတူစ့ဖိ ပၢဆှၢ၀ဲ ခ့ၣ်အဲၣ်ယူၣ် ခိၣ်နၢ် တနီၤဒီး ပၣ်ဃုာ်၀ဲ ဒီးခၢၣ်စး ၃၁ ဂၤအံၤ တအိၣ်ဒီး လီၢ်ခၢၣ်သးတၢ်ဟ့ၣ်ခွဲးဘၣ်ဒီး ခဲမုၢ်ဆ့ၣ် ကဟးထီၣ်၀ဲလၢကီၢ်ဆၢ တၢ်ဂ့ၢ်အံၤန့ၣ် ပှၤလၢအဃုသ့ၣ်ညါတၢ်တဖၣ် စံး၀ဲလီၤ.
ပှၤဃုသ့ၣ်ညါတၢ်တဂၤစံးဝဲ“ ခ့ၣ်အဲၣ်ယူၣ် ကတီၢ်အံၤလီၢ်ခၢၣ်သးဒီးသုး လီၤဖးလံ သုးတခီ တအိၣ်ဒီးတၢ်လူၤထွဲမၤထွဲဘၣ်ဒီး တၢ်လၢအ၀ဲဘၣ်သးမၤ၀ဲန့ၣ်ဃုထၢ၀ဲလံ. သုးဂ့ၢ် ၀ီခိၣ်ကျၢၢ် လီၢ်ခၢၣ်သး ြတီဃာ်အီၤအမဲာ်ညါ အ၀ဲသ့ၣ်ကလဲၤအိးထီၣ် လီၢ်ခၢၣ်သးတၢ်ရ့လိာ်မုာ်လိာ် အ၀ဲၤဒၢးခဲမုၢ်ဆ့ၣ်လီၤ. တၢ်အိးထီၣ်အမူးအံၤ ကီၢ်ခိၣ်၀ဲၤဒၢး ကိတိာ် အူအီၣ်မ့ ဟဲအိးထီၣ်၀ဲ အဃိ မ့ၢ်ဝဲ ပဒိၣ်တဖၣ် အတၢ်ဂိာ်စုဂိာ်ခီၣ်န့ၣ် ဖျါထီၣ်၀ဲအဂ့ၢ်န့ၣ်” စံး၀ဲလီၤ.
သုးခိၣ်ကျၢၢ် မူတူစ့ဖိဒီး ကီၢ်စၢဖှိၣ်ပတီၢ် ကီၢ်ပူၤတၢ်မုာ်တၢ်ခုၣ်တၢ်မၤ ကမံးတံာ် ကရၢခိၣ်ခံ အူအီၣ်မ့ တဖၣ်ပၢဆှၢ၀ဲ၀ံၤ ခ့ၣ်အဲၣ်ယူၣ် လီၢ်ခၢၣ်သး တၢ်ရ့လိာ်မုာ်လိာ်အ၀ဲၤဒၢးအံၤ တလါ အံၤ ၂၉ သီအနံၤကလဲၤအိးထီၣ်၀ဲဖဲ ၀့ၢ်ဖၣ်အၣ်န့ၣ်လီၤ.
ခဲမုၢ်ဆ့ၣ် ကဟးထီၣ်၀ဲ သုးခိၣ်ကျၢၢ် မူတူစ့ဖိ, ပဒိၣ်ဒ့ဘ့ၣ်ထီ,ပဒိၣ်ရွှ့ၣ်မီ, ပဒိၣ်ကွဲၤထူ၀့, သုးခိၣ်ကျၢၢ်ဖိ ကၠီၣ်နံၣ်ဒီး ပဒိၣ်အီၣ်မီၣ်အ့ပၣ်ဃုာ်၀ဲ၀ံၤ အါတက့ၢ်မ့ၢ်၀ဲ သုးက့ ၄,၆,ရ ခ့ၣ်အဲၣ်ယူၣ် ခိၣ်နၢ်လၢအထီတဖၣ်လီၤ.
ကရၢတနီၤအံၤ တအိၣ်ဒီး လီၢ်ခၢၣ်စးတၢ်ဟ့ၣ်ခွဲးဘၣ်ဒီး တလါအံၤ ၁၅ သီအနံၤဟါ ကွဲၢ်ကဘီ ဟံၣ်ဒွဲးန့ၣ် တၢ်ကအိးထီၣ်၀ဲ တၢ်ရ့လိာ်မုာ်လိာ်၀ဲၤဒၢးဒီး လီၢ်က ၀ီၤတၢ်ဂုၤထီၣ်ပသီ ထီၣ်တၢ်မၤတဖၣ်အဂီၢ် ထံၣ်ခူသူၣ်လိာ်သးအဂ့ၢ် ပှၤလၢအပၣ်ဃုာ်တဂၤစံး၀ဲလီၤ.
ခ့ၣ်အဲၣ်ယူၣ် လီၢ်ခၢၣ်သးတၢ်ပာ်သးတခီ ဘၣ်ထွဲတၢ်ပတုာ်တၢ်ခး ခံကပၤလၢာ်တၢ်လၢ ကဘၣ် လူၤထွဲမူဒါတဖၣ်န့ၣ် ခံကပၤတၢ်လၢကဘၣ်လူၤထွဲတၢ်ဂ့ၢ်တဖၣ်, မ့ၢ်တၢၣ်ပီၣ်ဘှါရှဲ၀ဲမ့ၢ်၀ံၤမး ဒီး ဘၣ်ထွဲတၢ်မုာ်တၢ်ခုၣ် တၢ်သးလီၤပလိာ်တဖၣ် ကဆဲးသကိး၀ဲ စုမုၢ်ကျၢၢ်အဂ့ၢ်န့ၣ်ပသ့ၣ်ညါ ဘၣ်အီၤလီၤ. ဘၣ်ဆၣ်သနာ်က့ သုးခိၣ်ကျၢၢ် မူတူစ့ဖိ ပၢဆှၢ၀ဲကရၢတခီ မ့ၢ်ဆဲးစုမုၢ်ကျၢၢ်ဒီး ပဒိၣ်လၢတၢ်မုာ်တၢ်ခုၣ်မ့ၢ်၀ံၤမးဒီး အ၀ဲသ့ၣ်နီၢ်ကစၢ်တၢ်ဘၣ်သးတဖၣ် မ့ၢ်ဃ့၀ဲန့ၣ် ကဘှါရှဲ၀ဲ န့ၢ်အဂ့ၢ် စံးဝဲလီၤ.
ကတီၢ်အံၤတၢ်အိၣ်သး တၢ်ကသ့ၣ်ညါဘၣ်အီၤအဂီၢ် ခ့ၣ်အဲၣ်ယူၣ် ခိၣ်နၢ်တၢ်ဖီခိၣ်တဖၣ် ပဆဲးကျိးသံကွၢ်သနာ်က့ ဒ်သိးကဟ့ၣ်ထီၣ်တၢ်ပာ်သးသနာ်က့ ဂ့ၢ်လိာ်၀ဲလီၤ. ခဲမုၢ်ဆ့ၣ် တၢ်ကကိး၀ဲ ဂ့ၢ်ဂီၢ်အူ တၢ်အိၣ်ဖှိၣ်၀ံၤ သုးခိၣ်ကျၢၢ် မူတူစ့ဖိ ပၢဆှၢဝဲ ဖၣ်အၣ်လီၢ်ခၢၣ်သးတၢ်ရ့ လိာ်မုာ်၀ဲၤဒၢးတၢ်ဂ့ၢ်အံၤန့ၣ် ကအိၣ်ဒီးလံာ်ဘိဘၣ်ရၤလီၤအဂ့ၢ် န့ၣ်ပသ့ၣ်ညါဘၣ်အီၤလီၤ.
ခ့ၣ်အဲၣ်ယူၣ် လီၢ်ခၢၣ်သးဒီးသုးဂ့ၢ် ၀ီခိၣ်ကျၢၢ်အဘၢၣ်စၢၤ တလါအံၤ စးထီၣ်န့ၣ် တကပၤဒီး တကပၤလူၤထွဲမၤထွဲတၢ်ဒီး တကပၤဒီးတကပၤ တအိၣ်ဒီးတၢ်ပာ်ကဲလိာ်သးလၢၤဘၣ်ဒီးခံ ကပၤလၢာ် တၢ်ပာ်သးတဖၣ် ဟ့ၣ်ကဒါလိာ်သးလီၤ.
ဘၣ်ထွဲတၢ်ကအိးထီၣ်၀ဲ ဖၣ်အၣ်လီၢ်ခၢၣ်သးတၢ်ရ့လိာ်မုာ်လိာ်၀ဲၤဒၢး တၢ်ဂ့ၢ်အံၤ တၢ်ကတၢၣ် ပီၣ်အီၤအိၣ်ဒံးအဃိ ကတီၢ်အံၤ တဘၣ်အိးထီၣ်၀ဲဘၣ်အဂ့ၢ်န့ၣ် တလါအံၤ ၈ သီအနံၤ ခ့ၣ်အဲယူၣ် အနဲၣ်ရွဲၢ်ခိၣ်ကျၢၢ် နီၢ်စံၣ်ဖိရၤစ့ၤ မၤ၀ဲတၢ်မုာ်တၢ်ခုၣ်ကမံးတံာ်လၢအမ့ၢ် ကီၢ်စၢဖှိၣ် ကိတိာ် အူအီၣ်မ့, အူခ့ၣ်ယံၣ်, အူစိသ့ တဖၣ်အအိၣ် တဲပၠး၀ဲကွဲကျၢလၢလံာ်သနာ်က့ ဆီတ တလဲအမဲာ်သၣ်ဒီးတၢာ်ကွံာ်၀ဲအဂ့ၢ် ခ့ၣ်အဲၣ်ယူၣ် ခိၣ်နၢ်တဂၤစံး၀ဲလီၤ.
ခ့ၣ်အဲၣ်ယူၣ်လီၢ်ခၢၣ်သးတခီ ဒ်န့ၣ်အသိးလံာ်တဘ့ၣ်န့ၣ် တလါအံၤ ၁၁ သီအနံၤ တၢ်ဆှၢ၀ဲ ဆူသုးခိၣ်ကျၢၢ် မူတူစ့ဖိ အအိၣ်သနာ်က့ တကပၤတခီ ဂ့ၢ်လိာ်၀ဲအဃိ ကဲထီၣ်တၢ်ဘၣ်ဂံာ်ဂူာ် အဂ့ၢ် ခ့ၣ်အဲၣ်ယူၣ်တကပၤစံး၀ဲလီၤ.
ကီၢ်ပယီၤပဒိၣ် ခီဖျိမၤတၢ်ဒ်အံၤအဃိ ခံကပၤအဘၢၣ်စၢၤ တၢ်မုာ်တၢ်ခုၣ်တၢ်မၤတဖၣ် ဟးဂီၤ၀ဲသ့အဂ့ၢ် ပှၤလၢအမၤတၢ်မုာ်တၢ်ခုၣ်တနီၤ ဆိကမိၣ်၀ဲဒီး ပဲာ်ဖးနီၤဖး၀ဲလီၤ.
Post a Comment