တနီသရံးကီၢ်ခီၣ်ဒိၣ် ဘျံးဒ၀ဲၢ်ကီၢ်ဆၣ်အပူၤ ကဆီ၀ါကရူၢ် ပၢဆှၢဒူသ၀ီခိၣ် အပူၤကွံာ် စဲးပထ့ ဘၢၣ် ၃ သီအနံၤ ကီၢ်ပယီၤပဒိၣ်အသုးတဖၣ် ဟဲမၤပျံၤမၤဖုး၀ဲဒီးတၢ်စုက၀ဲၤအဃိ ခံကပၤ လၢာ် တၢ်ဖ့ၣ်ဆၢအိၣ်ထီၣ်၀ဲန့ၣ် ခ့ၣ်အဲးစံၣ် ဃုသ့ၣ်ညါဘၣ်၀ဲလီၤ.
ဘျံးဒ၀ဲၢ်ကီၢ်ဆၣ်အပူၤ ဒုးယာ် နီၣ်ဂံၢ် ၃ တၢ်မဲာ်ညါခီၣ်ချ့သုးရ့ၣ် ၄၀၂ လၢအမ့ၢ် သုးခိၣ် န့ၣ်မၠိအီၣ် အံၤ လၢကဟဲဆီတလဲ၀ဲ သုးလၢ အမိၣ်သ၀ီအဂီၢ် ကဆီ၀ါကရူၢ် ဒူသ၀ီပၢဆှၢခိၣ် စီၤလ့အီၣ် အံၤ ကိးထံၣ်၀ဲ၀ံၤ မၢ၀ဲပှၤရဲၣ်ကျဲၤန့ၢ်အီၤသိလ့ၣ်ဒီး တၢ်တမၤန့ၢ်အီၤအဖီခိၣ် တဲအါလိာ်သး၀ံၤ ထုးထီၣ်၀ဲ တၢ်စုက၀ဲၤဒီး မၤပျံၤမၤဖုး၀ဲအဃိ တၢ်ဖ့ၣ်ဆၢကဲထီၣ်၀ဲအဂ့ၢ် ပသ့ၣ်ညါဘၣ်အီၤလီၤ.
ဘၣ်ထွဲဒီးတၢ်ဂ့ၢ်အ၀ဲန့ၣ် လီၢ်က၀ီၤဖိတဂၤစံး၀ဲ “ အပူၤကွံာ်အိၣ်စ့ၢ်ကီးလီၤ. ဖဲန့ၣ်အကတီၢ် ဒူသ၀ီပှၤပၢဆှၢတၢ်ခိၣ် အိၣ်ဒီးတၢ်နၢ်ပၢၢ်လိာ်သးအဃိ ဘၣ်လိာ်ဖိးဒ့လီၤ. အခဲအံၤ ဒူသ၀ီ ပၢဆှၢတၢ်ခိၣ် စ့ၢ်ကီး တူၢ်ခီၣ်တကဲလၢၤဘၣ်. ဖဲန့ၣ် တၢ်စံးတၢ်ကတိၤတဂၤတဖျၢၣ် အါထီၣ်၀ဲ ဒီး ကဲထီၣ်အသးအဂ့ၢ်” စံး၀ဲလီၤ.
ပဒိၣ်အသုးအံၤ နီၣ်ဂံၢ် ၈ ပၢဆှၢရဲၣ်ကျဲၤသုးအဖီလာ် တၢ်မဲာ်ညါဒုးယာ် ၃ သုးခိၣ် ကၠံၣ်စိ အဖီ လာ် သုးတဖၣ်အံၤ အပူၤကွံာ် ဒူသ၀ီဖိတဖၣ်အဖီခိၣ် မၢဆူၣ်မၢဆိး၀ဲဒီး ၀ံစိာ်တီဆှၢန့ၢ်အီၤ သိလ့ၣ်လၢအတီဆှၢပှၤကူပှၤကညီတဖၣ်စ့ၢ်ကီး မၢအီၣ်၀ဲခီလီဒီး တဟ့ၣ်၀ဲအဘူးအလဲဘၣ် ဒီး တၢ်ခီးထုးအီၤလၢကျဲတဖၣ်အိၣ်စ့ၢ်ကီးလီၤ.
ဒ်န့ၣ်အသိးစ့ၢ်ကီး တၢ်ကဲထီၣ်အသးအံၤ ခီဖျိ တၢ်မၢဆူၣ်မၢဆိးဒီးကိး၀ဲပှၤ၀ံတၢ်ဖိ တဖၣ်တ အိၣ်၀ဲဘၣ်ဒီး ခီဖျိသုးတၢ်ဆီတလဲအဃိ တၢ်ကငါန့ၢ်အီၤသိလ့ၣ် အဃိ ဒူသ၀ီပၢဆှၢတၢ်ခိၣ် တၢ်ဃ့အီၤတၢ်မၤစၢမ၀ံၤ ခီဖျိ တၢ်တဲအါအိၣ်ထီၣ်ဝဲတစံးတက့ၢ်ဒီး တၢ်ဖ့ၣ်ဆၢကဲထီၣ်၀ဲ လီၤ. အဂ့ၢ်န့ၣ် လီၢ်က၀ီၤဖိတဖၣ်စံး၀ဲလီၤ.
သ၀ီဖိလၢတၢ်ဖီခိၣ်တဂၤစံး၀ဲအသိးန့ၣ်“ ခဲအံၤဘၣ်လီၢ်ဘၣ်စးက့ၤလံ, ဒူသ၀ီပၢဆှၢတၢ်ခိၣ် တခီ ဟးဃုန့ၢ်အီၤသိလ့ၣ်လၢ သ၀ီပူၤဒီး ဆှၢဟ့ၣ်အီၤအဂ့ၢ်” စံးဝဲလီၤ.
ကီၢ်ပယီၤပဒိၣ်အသုးအံၤ မၤတၢ်ပတုာ်တၢ်ခးဒီး ကလုာ်ဒူၣ်ဖီၣ်စုက၀ဲၤတဖၣ်သနာ်က့ ဒူသ၀ီ လၢအအိၣ်ယံၤဒီး၀့ၢ်တဖၣ်တနီၤ တၢ်မၢဆူၣ်မၢဆိး, ဖီၣ်ဆူၣ်မၤအၢမၤနးဒီး တၢ်မၤဘၣ်ဒိဘၣ် ထံးပှၤဂ့ၢ်၀ီခွဲးယာ်တဖၣ် အိၣ်ဒံး၀ဲအဖၢမုၢ်လီၤ.
တၢ်ဖ့ၣ်ဆၢကဲထီၣ်အသးအံၤ ဖဲ စဲးပထ့ဘၢၣ် ၃ သီအနံၤ ပဒိၣ်အသုးဒီး ခ့ၣ်အဲၣ်ယူၣ် တၢ်မုာ် တၢ်ခုၣ်ခၢၣ်စးတဖၣ် ထံၣ်လိာ်အသးဖဲ ကညီကီၢ်စဲၣ် ဖၣ်အၣ်၀့ၢ်အဆၢကတီၢ်ဒီး လၢ မဲ၀ဲၤကရူၢ် တခီ ပဒိၣ်အသုးတဖၣ် တယံာ်လၢၤဘၣ်ကဘၣ်က့ၤ၀ဲလၢ အလီၢ်အကျဲအဂ့ၢ် ဖဲအပူၤကွံာ် ခံသီအနံၤ သ၀ီဖိတဖၣ်စံး၀ဲအဃိပသ့ၣ်ညါဘၣ်အီၤလီၤ.
Post a Comment