ဖဲလၢ အဟဲက့ၤလၢအဟံၣ်ကတီၢ် ဟဲက့ၤ၀ဲလၢ အခီၣ်အကတီၢ် ကီၢ်ပယီၤပဒိၣ်အသုး တဖၣ် ဖီၣ်ဃာ်အီၤဒီး မၤအၢမၤနးအီၤအဂ့ၢ်လီၢ်က၀ီၤဖိတဂၤစံး၀ဲလီၤ.
“လအီၣ် အံၤ တဟဲက့ၤ၀ဲလၢ မီၣ်မီၤဘွါအကျဲဘၣ်ဒီး က့ၤ၀ဲလၢ ကျဲလၢအလီၤဘၣ်ယိၣ်အဃိ ပဒိၣ်အသုးလၢ အအိၣ်လၢ စ့အီၣ်ခီပနံၣ်တဖၣ် ထံၣ်အီၤဒီး သမံသမိးအီၤလၤ. ဖီၣ်၀ဲ၀ံၤ ထၢနုာ်လီၤ၀ဲလၢ ဆၣ်လၣ်အဒၢပူၤဒီးမၤအၢမၤနး၀ဲလီၤ. ၀ံၤဒီး ကွံာ်လီၤ၀ဲဆူ ထံကျိပူၤလီၤ. အမိၢ်တခီစံး၀ဲလၢ က့ၤတသ့ဒံးဘၣ်, အမိၢ်တခီ ခီဖျိပုဒီးဖိသၣ်အဃိ က့ၤလူၤအီၤတချုးဘၣ်. ပှၤလၢအထံၣ်ချုးတၢ်ဂၤစံး၀ဲလီၤ.
ပယီၤပဒိၣ်အသုးအံၤ သံကွၢ်၀ဲ မီၣ်လအီၣ် ဒီးဖီၣ်ဃာ်၀ဲအံၤ တၢ်က့ၤစံးဆၢအီၤ တဘျ့ ဘၣ်အဃိ ဘၣ်တၢ်မၤသံအီၤအဂ့ၢ် လီၢ်က၀ီၤဖိတဖၣ် စံး၀ဲလီၤ. တုၤခဲကနံၣ်အံၤ တၢ် တထံၣ်ဒံးအစိၣ်ဘၣ်ဒီး အဘူးအတံၢ်တဖၣ် တီၣ်ထီၣ်ဃာ်၀ဲလၢ သုးခံကပၤလၢာ် အအိၣ် န့ၣ်ပသ့ၣ်ညါဘၣ်အီၤလီၤ.
ကတီၢ်အံၤ ဖၣ်ကၣ် လၢၢ်လါ မီၣ်ဟီၣ်က၀ီၤပူၤ ကီၢ်ပယီၤပဒိၣ်အသုးလၢအအိၣ်ဖဲန့ၣ်တဖၣ် ပှၤကမျၢၢ်လၢ အဟးထီၣ်ဟးလီၤတဖၣ် ဖီၣ်ဃာ်၀ဲဒီး သမံသမိး၀ဲဒီး ခး၀ဲဒီးတၢ်စုက၀ဲၤအိၣ်၀ဲ ၀ံၤ ဖဲလၢ စဲးပထ့ဘၢၣ် ၅ သီအနံၤစ့ၢ်ကီး မီၣ်၀ါလီၢ်က၀ီၤဖိ အူကရဲၣ်နီၣ်ကၠါ တဂၤ ခးသံစ့ၢ် ကီး၀ဲဒီး တၢ်စုက၀ဲၤလီၤ.
မီၣ်၀ါ ခရံာ်ဖိ တၢ်ဘါယွၤသရိာ်အံၤ ပှၤဘၣ်ဃ့ၢ်လၢ တၢ်ဒုးတၢ်ယာ် ဘၣ်ကီဘၣ်ခဲ အိၣ်၀ဲ ၈၆၅ ဂၤ၀ံၤ ကတီၢ်အံၤ တၢ်အီၣ်တၢ်အီဒီး ကသံၣ်ကသီတဖၣ်, ဒီးတၢ်အိၣ်တၢ်ဆိးတဖၣ် အဂီၢ် ထံၣ်ဘၣ်၀ဲ တၢ်ကီတၢ်ခဲလီၤ.
Post a Comment