တၢ်ဖီၣ်န့ၢ်ကသံၣ်ကသ့ၣ် ၆၅ ကလီၢ် လၢတၢ်တီဆှၢအီၤလၢ​ ကီၢ်ပယီၤ

ကီၢ်ပယီၤပူၤ တၢ်ကဆှၢ၀ဲ ကသံၣ်ကသ့ၣ် ၆၅ ကလီၢ်ဘျဲၣ်အံၤ အီးကထိဘၢၣ် ၆ သီအနံၤ အ့ဒယၣ် ထံကီၢ် မံၣ်ဇိရၣ် ကီၢ်စဲၣ် ကိလၣ်စ့း၀့ၢ်အကပၤ Khuang Pui lam ကျဲမုၢ်ဖးဒိၣ်လၢ အလဲၤတၢ်ယံၤ ကိလၣ်စ့း ၀့ၢ် တၢ်ထီဒါကသံၣ်မူၤဘှီးကရၢ ဖီၣ်ချုးအီၤလီၤ.

ကသံၣ်၀ဲအံၤ အလုၢ်အပှ့ၤကလီၤလၢ၀ဲလၢ ရူပံးအစ့ ၉၈ ကလီၢ်, မ့မ့ၢ်လၢ ကၠးတခီ ၁၅၀၀ ကလီၢ်ဘျဲၣ် လုၢ်ပှ့ၤအိၣ်၀ဲထဲန့ၣ်အဂ့ၢ် စံး၀ဲဒၣ်လီၤ. 

ဒ်ပနၢ်ဟူတ့ၢ်ဃာ်၀ဲ တၢ်စီၣ်အသိးန့ၣ် အၣ်သၣ်ကီၢ်စဲၣ် ၀့ၢ် ကိ၀ၣ်ဟတံၣ် တုၤလၢ မံၣ်ဇိၣ်ရၣ်ကီၢ်စဲၣ် အပူၤ သိလ့ၣ်တီဆှၢပနံာ်လၢ အဟဲက့ၤတခိၣ် အံၤ Khuang Pui lam ကျဲမုၢ်လါခိၣ်လၢအလဲၤတၢ် ယံၤအဖီခိၣ်အံၤ ဟးဃု၀ဲဒီး ဖီၣ်ချုး၀ဲဒၣ်န့ၣ် ပှၤထီဒါကသံၣ်မူၤဘှီးကရၢ စံး၀ဲလီၤ. 

ပှၤလၢအနီသိလ့ၣ် တဂၤစံး၀ဲအသိးန့ၣ် အ၀ဲဟဲက့ၤတီဆှၢ၀ဲ တၢ်ဖိတၢ်လံၤအံၤ မ့ၢ်မနုၤလဲၣ်မး တသ့ၣ်ညါ၀ဲဘၣ်, အဲၣ်ဇီ၀့ၢ် ကဘၣ်တီဆှၢ၀ဲလၢအတုၤန့ၣ် သ့ၣ်ညါ၀ဲလီၤန့ၣ် စံး၀ဲလီၤ.
“ ပ၀ဲသ့ၣ်မ့ၢ်၀ဲ ပှၤနီသိလ့ၣ်လီၤ, ဘၣ်ထွဲ၀ံစိာ်တီဆှၢတဖၣ်အဂီၢ် ကယဲၢ်မ့ၢ် တၢ်ဖိတၢ်လံၤလၢ ပှၤမၢ်လိာ် အလီၢ်န့ၣ် ပကဘၣ်ဆှၢအီၤဒ်အတုၤအသိးန့ၣ်မ့ၢ်၀ဲ ပမူဒါလီၤ. အခဲအံၤ တၢ်ဖိတၢ်လံၤလၢ တဖိးမံဒီးသဲစးတဖၣ် ပၣ်ဃုာ်၀ဲအဃိ ပထံၣ်ဘၣ်တၢ်ကီတၢ်ခဲလီၤ.  ပှၤလၢအဆှၢဟ့ၣ်တၢ် အမံၤမ့ၢ်၀ဲ အယီၤအဘျၣ်, ဘၣ်ဆှၢစ့ၢ်ကီး တၢ်လီၢ်တဖၣ် မ့ၢ်၀ဲအယီၤအဘျၣ်အဃိ ဒ်သိးတၢ်ကဖီၣ်န့ၢ် ပှၤဘၣ် ကွီၢ်မ့ၣ် အဂီၢ် တၢ်ကီတၢ်ခဲအိၣ်၀ဲလီၤ.”

ကသံၣ်တဖၣ်အံၤခဲလၢာ်န့ၣ် တၢ်အီးကွံာ်အဘ့ၣ်၀ံၤ တၢ်ထၢနုာ်အီၤလၢ ပလးစတ့း အဒၢပူၤတခါ လီၤ. အၣ်သၣ်ကီၢ်စဲၣ် ကီၢ်ဆၣ် ကိ၀ၣ်ဟတံး တုၤလၢ မံၣ်ဇိၣ်ရၣ် ကီၢ်စဲၣ်အပူၤ နုာ်လီၤမ့ၢ်၀ံၤန့ၣ် အဆိကတၢၢ်ကတုၤလီၤ၀ဲလၢ​ ကိၣ်လၣ်စ့ၣ် ၀့ၢ်ပူၤလီၤ.

ကိၣ်လၣ်စ့ၣ် ၀့ၢ် သိလ့ၣ်ြတဲၤအခိၣ်စံး၀ဲ “ ကိၣ်လၣ်စ့ၣ် ၀့ၢ်တုၤလၢ အဲၣ်ဇီ၀့ၢ်အံၤ သိလ့ၣ်တီဆှၢတၢ်ဖိ တၢ်လံၤခဲလၢာ် ကဘၣ်ဟဲနုာ်လီၤ၀ဲဒီးကဘၣ်အိၣ်ပတုာ်လီၤ. အစှၤကတၢၢ် တနံၤအတီၢ်ပူၤ သိလ့ၣ် ၁၅ ခိၣ်ဃၣ်ဃၣ် နုာ်လီၤ၀ဲလၢ​ ြတဲၤ၀ဲအံၤအပူၤလီၤ. မုၢ်ဟါခီ သိလ့ၣ် မ့ၢ်ရှဲမးဒီး နုာ်လီၤ၀ဲလၢ အဲၣ်ဇီၣ်၀့ၢ် သ့လီၤ.  တၢ်တီၣ်ထီၣ်၀ဲ တၢ်ဖိတၢ်လံၤ အါအါဂီၢ်ဂီၢ်အဃိ ကသမံသမိးအဂီၢ် တညီ ဘၣ်. တၢ်ဘိၣ်ဃာ်အီၤလၢ ပၣ်စ့ၣ် ပါဆယ် တဖၣ် ပမ့ၢ်အိးကွၢ်၀ံၤဒီး သမံသမိးအီၤန့ၣ် တၢ်ကီတၢ်ခဲအိၣ်အ ဃိ ကသံၣ်ကသ့ၣ်လၢ အလဲၤတလၢကွံာ် အိၣ်၀ဲဖးအါလီၤ” အဂ့ၢ် စံး၀ဲဒၣ်လီၤ. 

အီကူာ်, စဲးပထ့ဘၢၣ် ဒီး အီးကထိဘၢၣ် ၃ လါအတီၢ်ပူၤ မံၣ်ဇိရၣ်ကီၢ်စဲၣ်အပူၤ တၢ်တီဆှၢ၀ဲ ကသံၣ်ကသ့ၣ် လၢကီၢ်ပယီၤပူၤ လီၤလၢလၢ ရူပံးစ့ ၁၂၉ ကလီၢ်, ကၠး အကလီၢ် ၂၀၀၀ ဘျဲၣ် အံၤ တၢ်ဖီၣ်န့ၢ်စ့ၢ်ကီးအီၤလီၤ.