ယိၤဒိၣ်ကလံၤစိး မိကိဟီၣ်က၀ီၤပူၤ ကီၢ်ပယီၤပဒိၣ်ဒီး ခ့ၣ်အဲးအ့ၣ် အဘၢၣ်စၢၤတၢ်ဒုးကဲထီၣ်

ယိၤဒိၣ်ကလံၤစိး မိကိ Munggu ဟီၣ်က၀ီၤ နီၣ်ဟါဒီး ဆွ့ၣ်အဲ အပူၤ ပယီၤပဒိၣ်အသုး ခလရ ၆၉ အသုးဒီး ကခၠ့ၣ်တၢ်ထူၣ်ဖျဲးသုးမုၢ်ဒိၣ် ခ့ၣ်အဲးအ့ၣ် သုးက့ ၄ ကမျၢၢ်တၢ်ဒီသဒၢသုးကရူၢ် MHH သုးဒ့ ၅ တဂီၤအံၤ ဂီၤခီ ၁၀ နၣ်ရံၣ်ဘျဲၣ်န့ၣ် တၢ်ဒုးကဲထီၣ်၀ဲအဂ့ၢ် တၢ်မဲာ်ညါ အ့ၣ်အဲးအ့ၣ် ပှၤဘၣ်မူဘၣ်ဒါတ ဂၤစံးဘၣ်၀ဲအသိးပသ့ၣ်ညါဘၣ်အီၤလၢ KNG တၢ်ကစီၣ်ပာ်ဖျါ၀ဲအသိးလီၤ.

“ အ၀ဲသ့ၣ်တခီ ခးနါစိၤ၀ဲအဃိ အခဲအံၤ ခးအဖၢမုၢ်လီၤ. ခးတယၢၢ်အီၤလီၤ.  အခဲအံၤ ပနၢ်ဟူအ သီၣ်ဒံးလီၤ. လၢပ၀ဲသ့ၣ်တကပၤဒုတဘၣ်တၢ်နီတမံၤဘၣ်. အခဲအံၤပအိၣ်ဘူးဒီးအ၀ဲသ့ၣ်လီၤ. ပဒိၣ် အသုးတကပၤ သံပှဲၤဂၤ, ဘၣ်ဒိပှဲၤဂၤတသ့ၣ်ညါ အခဲအံၤ ဆဲးဒုးဒံးတၢ်အဂ့ၢ်” စံး၀ဲလီၤ.

ကီၢ်ပယီၤပဒိၣ်အသုးအံၤ နီၣ်ဟါ အပူၤ သုးဂံၢ်ဘါ ၁၀၀ ဘျဲၣ်အိၣ်၀ဲ၀ံၤ တနံၤအံၤ ဂီၤခီ ဟးထီၣ်ဝဲအ ဆၢကတီၢ် ခ့ၣ်အဲၣ်အ့ၣ် အသုးကရူၢ်တဖၣ် ထံၣ်အီၤ၀ံၤ ခးအီၤအီၤအဂ့ၢ်န့ၣ် ပသ့ၣ်ညါဘၣ်အီၤလီၤ.

ကီၢ်ပယီၤပဒိၣ်အသုးအံၤ လၢ မိကိဟီၣ်က၀ီၤ ကခၠ့ၣ်သ၀ီတဖၣ်အပူၤ မ့ၢ်၀ဲ သုးတကရူၢ်လၢ အဟဲထီၣ်ဃုအီၣ်တၢ်၀ံၤ က့ၤဖီၣ်ဝဲ သ၀ီဖိသၢဂၤအဂ့ၢ်န့ၣ် ပသ့ၣ်ညါဘၣ်အီၤလီၤ.

အပူၤကွံာ် အီးကထိဘၢၣ် ၇ သီအနံၤ ၁၀ နၣ်ရံၣ်ဘျဲၣ်စ့ၢ်ကီး ကခၠ့ၣ်ကီၢ်စဲၣ်  ခ့ၣ်အဲးအ့ၣ် ၀ဲၤလီၢ်ခိၣ်သ့ၣ် လီၢ်လံၤလၢအမ့ၢ် နၣ်ဖီ န့ၣ် ပယီၤပဒိၣ်အသုးကပၤ ပှၤဘၣ်မူဘၣ်ဒါတဂၤ ဘၣ်ဒိဒီး သုးဖိတဂၤ ဘၣ်တၢ်က့ၤကိးအီၤလၢ ကဘီယူၤအဂ့ၢ်န့ၣ် ခ့ၣ်အဲးအ့ၣ် စံးဘၣ်၀ဲ ခ့ၣ်အဲၣ်ကၠံၣ် အဃိ ပသ့ၣ်ညါဘၣ်အီၤလီၤ.

“ မဟါတနံၤ ကဘီယူၤ က့ၤစိာ်၀ဲ ပှၤခဲလၢာ် ၆ ဂၤလီၤ. ပှၤလၢ ဘၣ်ဒိနးနးကလဲာ်အိၣ် ခံဂၤလီၤ. အိၣ်တ့ၢ် ၄ ဂၤတခီ တဘၣ်တၢ်နီတမံၤဘၣ်ဒီး အိၣ်ခိးပှၤဆါလီၤ. မ့ၢ်အခီလဲအပှၤဧါတသ့ၣ်ညါဘၣ်.

ကဘီယူၤအံၤ ခ့ၣ်အဲးအ့ၣ် အသုးတဖၣ် ခး၀ဲလၢ ကျိခးကဘီယူၤသနာ်က့ ခီဖျိခး၀ဲလၢအယံၤအဃိ တဘၣ်၀ဲဘၣ်အဂ့ၢ်န့ၣ် ပသ့ၣ်ညါဘၣ်အီၤလီၤ.

“ ၁၀ နၣ်ရံၣ် အကတီၢ်န့ၣ် ဟဲလီၤ၀ဲလီၤ.  ဖဲန့ၣ်ကတီၢ်ပခးသနာ်က့ ၂ မံးနံးဟးထီၣ်၀ဲ၀ံၤ ၁၀ တခီ န့ၣ် က့ၤစိာ်က့ၤ၀ဲ ပှၤဆါအဂ့ၢ် ” ပှၤတၢ်မဲာ်ညါတဖၣ်စံး၀ဲလီၤ.

လၢကဘီယူၤ စိာ်ဆှၢပှၤဆါအံၤ ဟဲ၀ဲဒၣ်လၢ မၠံးကၠံနါတကပၤန့ၣ် ပသ့ၣ်ညါဘၣ်အီၤလီၤ. လၢ နၣ်ဖီ ဟီၣ်က၀ီၤပူၤ ကီၢ်ပယီၤပဒိၣ်အသုးတဖၣ်အံၤ ကတီၢ်၀ဲအံၤန့ၣ် တၢ်ဟဲစိာ်န့ၢ်အီၤ တၢ်အီၣ်တၢ်အီလၢ ကဘီယူၤအဂ့ၢ် ခ့ၣ်အဲးအ့ၣ် ပှၤဘၣ်မူဘၣ်ဒါတဖၣ် စံး၀ဲလီၤ.

လၢ သုးဒဲက၀ီၤအခိၣ်အဃၢၤန့ၣ် ခ့ၣ်အဲးအ့ၣ် အသုးတဖၣ် ဟံးန့ၢ်၀ဲတၢ်လီၢ်အဃိ လၢကဟံးန့ၢ်တၢ် အီၣ်လၢ ခိခိၣ်ကျဲတခီ တသ့လၢၤဘၣ်န့ၣ် ပသ့ၣ်ညါဘၣ်အီၤလီၤ. နၣ်ဖီ သုးဒဲက၀ီၤအပူၤ ကတီၢ်အံၤ ကီၢ်ပယီၤပဒိၣ်အသုး ၁၀၀ ဘျဲၣ်အိၣ်၀ဲအဂ့ၢ် န့ၣ် ပသ့ၣ်ညါဘၣ်အီၤလီၤ.