တၢ်သူၣ်ထီၣ်န့ၢ် သုးခိးကီၢ်ဆၢ အတၢ်သူၣ်ထီၣ် လၢ အဆိအခ့ျဖဲ ကတၢတံး ဖၣ်ပူၣ် ကီၢ်ဆၣ်

စဲးပထ့ဘၢၣ် ၂၈ သီ ,၂၀၁၂ နံၣ် , စီၤခါဆူညါ (ခ့ၣ်အဲးစံၣ်)

ကညီကီၢ်စဲၣ်, ဖၣ်ပူၣ်ကီၢ်ဆၣ် ကတၢတံးကရူၢ် အကပၤ ကညီသုးခိးကီၢ်ဆၢ တဖၣ် အိၣ်၀ဲန့ၣ်ဒီး ခီဖျိပယီၤပဒိၣ်တခီ တၢ်မၤရှဲဟီၣ်ခိၣ်ဒီး တၢ်သူၣ်ထီၣ်တဖၣ် သူၣ်ထီၣ်၀ဲဒၣ်အဂ့ၢ် ကတီၢ်အံၤ တၢ်သူၣ်ထီၣ်၀ဲတၢး ၄၀ ဃၣ်ဃၣ်၀ံၤလံအဂ့ၢ် လီၢ်က၀ီၤဖိတဖၣ် စံး၀ဲဒၣ်လီၤ. 

ကီၢ်ပယီၤပဒိၣ်ဒီး ကညီဒီကလုာ်စၢဖှိၣ်ကရၢ ခ့ၣ်အဲၣ်ယူၣ် အဘၢၣ်စၢၤအိၣ်ဒီး တၢ်ပတုာ်တၢ်ခး တၢ်သးလီၤပလိာ်၀ံၤအလီၢ်ခံ စးထီၣ် လါယူၤန့ၣ် ကီၢ်ပယီၤပဒိၣ်တကပၤ သုးခိးကီၢ်ဆၢ ဒီး အဟံၣ်ဖိ ဃိဖိအဂီၢ် လၢလီၢ်က၀ီၤ၀ဲန့ၣ် ဟီၣ်ခိၣ်လီၢ် အ့ကၢၣ်တဖၣ် ဘၣ်တၢ်မၤပျီအီၤဒီး ဘူၣ်ဒိၣ်ဇၣ်သိလ့ၣ် ဘူဒိုဇာကား ဒီး တၢ်ကသူၣ်ထီၣ်၀ဲ တၢ်သူၣ်ထီၣ်တဖၣ်န့ၣ် တၢ်စးထီၣ်မၤအီၤလီၤ. 

လီၢ်က၀ီၤဖိလၢ တအဲၣ်ဒိးပာ်ဖျါအမံတဂၤစံး၀ဲ“ တၢ်သူၣ်ထီၣ်တဖၣ်လၢ တၢ်သူၣ်ထီၣ်အီၤအံၤ အိၣ်၀ဲ တကထၢလီၤ. တၢ်လီၢ်တနီၤလၢ တၢ်သူၣ်ထီၣ်အီၤ၀ံၤလံန့ၣ် ပှၤလၢမုၢ်ဆ့ၣ်မုၢ်ဂီၤတဖၣ် တပျဲနုာ်၀ဲ ဘၣ်. ပထံၣ်ဘၣ်လၢ အ၀ဲသ့ၣ်မၤဝဲဒိၣ်ဒိၣ်မုၢ်မုၢ်လီၤ. ၀ံၤဒီးဖဲတၢ်လီၢ်၀ဲအံၤန့ၣ် ပှၤလီၢ်က၀ီၤဖိတဖၣ် လဲၤတူၢ်ငါ၀ဲတနံၤ ဟ့ၣ်၀ဲ ၂,၅၀၀ ကၠးတုၤလၢ ၃,၀၀၀ ကၠး၀ံၤ တူၢ်ငါ၀ဲလၢ တနံၤဂီၢ်တနံၤဂီၢ်လီၤ” အဂ့ၢ် စံးဘၣ်၀ဲ ခ့ၣ်အဲးစံၣ်လီၤ.  

၀ံၤဒီး ဟီၣ်ခိၣ်လီၢ်လၢ လီၢ်က၀ီၤဖိတဖၣ် ပၢ၀ဲန့ၣ် တၢ်ရှဲကွံာ်အီၤအံၤ အဂီၢ် ကဒိးန့ၢ်ဘၣ် တၢ်အီၣ်လီး ထဲလဲၣ်ထဲလဲၣ်န့ၣ် တသ့ၣ်ညါ၀ဲဘၣ်အသိး ကတီၢ်အံၤ တၢ်အိၣ်သးတၢ်သူၣ်ထီၣ်တဖၣ် တၢ်သူၣ်ထီၣ် အီၤအံၤ မဲး, ဘံလးမၠံၣ်ဒီး လၢၢ်တဖၣ် သိလ့ၣ်လၢအတီဆှၢတၢ်တဖၣ် အိၣ်၀ဲ အခိၣ် ၃၀ ဘျဲၢ်အဂ့ၢ် လီၢ်က၀ီၤဖိတဖၣ် စံး၀ဲလီၤ. 

ဒ်န့ၣ်အသိး ကတၢတံးကရူၢ်အပူၤ ကမျၢၢ်တဖၣ် ဘၣ်ထွဲဒီးတၢ်ကစီၣ် မံၣ်ဒံၢ်ယၢၣ်တဖၣ် တၢ်တဘၣ် ဆဲးကျိးတဂ့ၤအဂီၢ် ကီၢ်ပယီၤပဒိၣ်အသုးလၢ အအိၣ်သူၣ်လီၤအသးဖဲ ကတၢတံး အသုးဒဲက၀ီၤ သုးြတိၤ ၄၄, ဒုးယာ် ၄၄၂ ဒုးယာ်ခိၣ် တ့ၣ်ထိ အဖီလာ် ကီၢ်ပယီၤပဒိၣ်အသုး ခမရ ၁၀၂ ဒီး သုးခိး ကီၢ်ဆၢတဖၣ် လါအီကူာ် အနံၤ ဟ့ၣ်လီၤ၀်တၢ်ကလုၢ်အဂ့ၢ် ပသ့ၣ်ညါဘၣ်အီၤလၢ ကီၢ်ဆၢ တၢ်ကစီၣ် ဟဲ၀ဲလီၤ.

လီၢ်က၀ီၤပိာ်မုၣ်တဂၤစံး၀ဲ “ ဟ့ၣ်ပလီၢ်ပှၤဒ်အံၤအဃိ ပပျံၤတၢ်ဒီး တဲတဘူၣ်စ့ၢ်ကီးဘၣ်.  အ၀ဲသ့ၣ် ကီၢ်ပယီၤပဒိၣ်အသုးတခီ လၢသုးခိးကီၢ်ဆၢအဂီၢ် စံ၀ဲ၀ံၤ ကတၢတံးအကပူၤကပၤ ဟဲသူၣ်ထီၣ်ဝဲ ဟံၣ်တၢးတဖၣ်အါမးလီၤ. ခါလၢကဟဲတၢ်ကကဲထီၣ်အသးဒ်လဲၣ်န့ၣ် တသ့ၣ်ညါဘၣ်အဂ့ၢ်” စံးဝဲလီၤ.

ကီၢ်ပယီၤပဒိၣ်အသုးအံၤ ကတၢတံးကရူၢ်န့ၣ် ကတၢတံးသ၀ီပၣ်ဃုာ်၀ဲဒီး တီသူကျါ, ခီး၀ါထၣ်, နိၣ်ဖီထံ, ဘီကၠိၢ်လဲၤ, ကလါကိ, ကဲဒီ, ဘီကၠိၢ်ထၣ် သ၀ီသ့ၣ်တဖၣ်အံၤ တၢ်ဟ့ၣ်ပလီၢ်အီၤလီၤ.

တလါအံၤ တၢတနွံ ပဒိၣ်ဒီိးခ့ၣ်အဲၣ်ယူၣ် တၢ်မုာ်တၢ်ခုၣ်ခၢၣ်စးတဖၣ် သၢ၀ီတ၀ီ တၢ်ထံၣ်လိာ်အမူးပူၤ တၢ်ပာ်လီၤသုးအလီၢ်အကျဲတၢ်ဂ့ၢ်န့ၣ် မုၢ်ထီၣ်ကီၢ်ခီ သုး၀ဲၤလီၢ်ခိၣ်သ့ၣ် ကီၢ်ခီခိၣ် သုးခိၣ်ကျၢၢ် တ့ၣ်မီၣ်၀့ တခီ သုးခိးကီၢ်ဆၢအသုးတဖၣ် ကရူၢ်အံၤ အိၣ်၀ဲ ခံနံၣ်လံသနာ်က့ တၢ်လီၢ်တအိၣ်လီၤတံၢ် လီၤဆဲးဒံးဘၣ်အဖီခိၣ် ကတီၢ်အ့ၤ တၢ်ကပာ်ပနီၣ်န့ၢ်အီၤတၢ်လီၢ်အဂ့ၢ် တၢၣ်ပီၣ်သကိး၀ဲလီၤ.