လဲၣ်သၣ်ယၣ် စဲးဖီကဟၣ်လီၢ် ၁ အဟီၣ်က၀ီၤပူၤ ပိာ်မုၣ် အနံၣ် ၆၀ လၢအမဲာ်ချံဟးဂီၤတကပၤ မုၣ်ကမဲ အံၤ ဖိသၣ်မုၣ် ၂၂ နံၣ်တဂၤလၢ အကွၢ်လုၢ်အီၤအီၤ လၢ စဲးဖီကဟၣ် သၣ်မၣ်ဒံၣ် ပိာ်မုၣ်ဖိ အံၤ နာ်အီၣ်၀ဲ ပှၤဃုန့ၢ်အီၤတၢ်မၤ လၢန့ၣ်ပၠံၣ်ဒီၣ် တၢ်ဘှီသးအကျးလီၢ် လၢ စ့တၢ်ဟဲနုာ်အါ အဃိ လဲၤပိာ်၀ဲအခံ၀ံၤ ဘၣ်တၢ်မၤတရီတပါအီၤဒ်အမ့ၢ် နီၢ်ဒီမါ၀ၤအသိးန့ၣ် အနီၢ်ကစၢ် စံး၀ဲလီၤ. ခီဖျိ တၢ်အိၣ်ဆူၣ်အိၣ်ခ့ျအဃိ အိၣ်ဘှံးလၢ စဲးဖီကဟၣ်တၢ်မၤလီၢ်အကတီၢ် လါလဲ ၁ ကလီၢ်ဒီး တၢ်ချၢ စ့ ၁ ကလီၢ်အဃိ ခဲလၢာ် ၂ ကလီၢ်ကန့ၢ်၀ဲအဃိ လဲၤပိာ်၀ဲအခံအဂ့ၢ် စံးဝဲလီၤ.
န့ၣ်ပၠံၣ်ဒီၣ် ရွှ့ၣ်ကၠၣ်ပ့ၣ် က၀ီၤဒ့ တခီ ပှၤနီၢ်ဒီမါ၀ၤခံဂၤ မံလၢမုၢ်နၤဒီး တၢးခါလၢတၢ်ဖီလာ် အံၤ ပိာ်ခွါဖိလၢ အသးအိၣ် ၄၀ ဘျဲၣ်တဂၤ မၢ၀ဲတၢ်စံၢ်အီၤ၀ံၤ မၤတရီတပါအီၤဒ်အမ့ၢ် နီၢ်ဒီမါ၀ၤဒီး တီၢ်အီၤန့ၣ် စံး၀ဲဒၣ်လီၤ. ၀ံၤအလီၢ်ခံ ပိာ်မုၣ်အံၤ ဟးထီၣ်တလၢကွံာ်၀ဲ ကရၢၢ်ဒီး ပူၤဖျဲး၀ဲန့ၣ် ပိာ်မုၣ် အံၤ စံး၀ဲဒၣ်လီၤ. နီၣ်ဂံၢ် ၁ ပၢၤကီၢ်အရူ လါစဲးပထ့ဘၢၣ် ၁၃ သီအနံၤလၢတၢ်ကအိးထီၣ်၀ဲ တၢ်မူးအဂီၢ် ပၢၤကီၢ်တခီ တအဲၣ်ဒိးအိးထီၣ်၀ဲတၢ်မူးဘၣ်ဒီး အ၀ဲကဘၣ်မၤ၀ဲတုၤလၢ အစ့ကဘၣ် လိာ်ဖိးဒ့မ့ၢ်၀ံၤမးဒီး ကဘၣ်က့ၤ၀ဲန့ၣ် စံး၀ဲ၀ံၤ မၢ၀ဲအက့ၤလီၤ.
“ ပၢၤကီၢ်တအိးထီၣ်၀ဲ တၢ်မူးဘၣ်. အ၀ဲဟ့ၣ်ယၤစ့၀ံၤ တဘၣ်အိးထီၣ်တၢ်မူးတဂ့ၤ, ယဘၣ်သးအိး ထီၣ်သနာ်က့ တအိးထီၣ်၀ဲဘၣ်. မုၢ်ဟါလီၤပၢၤကီၢ်တဂၤဟဲ၀ံၤ ဟ့ၣ်ယၤ စ့တကလး၀ံၤ လၢကျဲ တရံးအဂီၢ် သိလ့ၣ်လံာ်ဖှီတဲာ်မၤန့ၢ်၀ဲလီၤ. တၢ်လၢအမ့ၢ်အိၣ်တ့ၢ်ဒံးတဖၣ် ပှ့ၤအီၣ်မ့ၤန့ၣ်စံး၀ဲလီၤ. ဖဲလၢ လဲၤတၢၣ်အဆၢကတီၢ် ပၢၤကီၢ်လွံၢ်ဂၤ ပထံၣ်ဘၣ်လၢအဖံဘၣ်ခိၣ်လိၤအိၣ်ဒီး ဆၣ် ၂ ဖျၢၣ်လီၤ. အ၀ဲစံး၀ဲ နမ့ၢ်အဲၣ်ဒိးက့ၤန့ၣ် လၢနဟံၣ်နနီမ့ၢ်ဟဲဟ့ၣ်စ့ ၅ ကလးမး နကဘၣ်က့ၤလီၤ. စ့တန့ၢ်ဒံး ဘၣ်န့ၣ် နတဘၣ်က့ၤဘၣ်အဂ့ၢ် စံးစ့ၢ်ကီး၀ဲလီၤန့ၣ်” တဲ၀ဲလီၤ.
အ၀ဲခီဖျိ ပၢၤကီၢ်တဖၣ် တအိးထီၣ်န့ၢ်အီၤတၢ်မူးဘၣ်ဒီး ဖဲလၢ က့ၤလၢကျဲအဆၢကတီၢ် ပှၤအၢပှၤ သီတဖၣ် လူၤပိာ်အခံအဃိ ပှၤလၢအမၤစၢၤအီၤ တီၣ်ထီၣ်အီၤလၢ သိလ့ၣ်ဆဲးကဲးအလိၤ၀ံၤ ပူၤဖျဲး၀ဲ န့ၣ်စံး၀ဲဒၣ်လီၤ. တၢ်အံၤ၀ံၤအလီၢ်ခံ ပှၤလၢအအိၣ်ဒီးတၢ်ဒိသူၣ်ဒိသး ပှၤမၤစၢၤတၢ်အဃိ လဲၤ၀ဲလၢ ပၢၤကီၢ်၀ဲၤလီၢ်ခိၣ်သ့ၣ်အအိၣ်ဒီး စဲးပထ့ဘၢၣ် ၁၅ သီအနံၤ အိးထီၣ်ဘၣ်၀ဲ တၢ်မူးလီၤ. တချုးတၢ် အိးထီၣ်ဒံး တၢ်မူးဒံးဘၣ်န့ၣ် ပၢၤကီၢ်တခီ တဲအီၤလၢ တဘၣ်အိးထီၣ်တၢ်မူးတဂ့ၤ ကဟ့ၣ်နၤ စ့ အကလီၢ် ၁၀ န့ၣ်ဃ့ထီၣ်၀ဲလီၤ.
“ လၢ စ့အကလီၢ် ၁၀ အံၤ မ့ၢ်ဟ့ၣ်ယၤန့ၣ် မ့ၢ်ယသးကမံဧါ, ယတလိၣ်ဘၣ်စ့ဘၣ်, ခီဖျိ တၢ်မၤ ဟးဂီၤယၤအဃိ ယကဘၣ်တၢၣ်လီၤ. သပှၢ်ကတၢၢ် ယဃ့ၢ်ဖျိးမ့ၢ်တန့ၢ်န့ၣ် ကပၣ်ဃုာ်ဒီး အဂုၤ အဂၤဒီး ကဘၣ်လဲၤဖဲလဲၣ်န့ၣ် တသ့ၣ်ညါလၢၤဘၣ်” အဂ့ၢ် စံး၀ဲလီၤ.
တၢ်တူၢ်လိာ်တၢ်မူး၀ံၤအလီၢ်ခံ နီၢ်ဒီမါ၀ၤခံဂၤဒီး သးစၢ်တဂၤ ခီဖျိမၤကူဆါအီၣ် ပှၤကူပှၤကညီအဃိ တၢ်ကအိးထီၣ်တၢ်မူးဒီး တၢ်ဖီၣ်ဃာ်အီၤလီၤ. လၢတၢ်ဒိသူၣ်ဒိသးလၢ ပိာ်မုၣ်တဂၤအံၤဖီခိၣ် ရွှ့ၣ်ကၠၣ်ပ့ၣ် က၀ီၤဒ့ မုၣ်ခွါတဖၣ် ဒ်သိးအ၀ဲပိာ်မုၣ်တဂၤကန့ၢ်ဘၣ် တၢ်ဖံးတၢ်မၤအဂီၢ် ရဲၣ်ကျဲၤန့ၢ်အီၤ လၢ တၢ်ဆါတၢ်ပှ့ၤအကျးတဖျၢၣ် ဒ်ပှၤမၤစၢၤတၢ် ဆါစၢၤတၢ်တဂၤအသိးန့ၢ်ဘၣ်၀ဲလီၤ.
ဘၣ်ထွဲတၢ်ဂ့ၢ်အံၤ ဒီကလုာ်ဒံၣ်မိၣ်ကရ့ၣ်စံၣ်၀ဲၤလီၢ်ခိၣ်သ့ၣ် အဲၣ်အဲလ်အိၣ် တၢ်ရ့လိာ်မုာ်လိာ်ပှာ်ဘျး စဲ ကရၢဖိ အူသဲ၀့ၣ် ဟဲတုၤ၀ဲ၀ံၤ တနံၤအံၤ တီၣ်ထီၣ်၀ဲဒၣ်လၢ ၀့ၢ်တကူၣ် အဲၣ်အဲလ်အိၣ် တၢ်ရ့လိာ် မုာ်လိာ်အ၀ဲၤဒၢးန့ၣ်လီၤ.
Post a Comment